Yangiliklar

Жорий йилнинг 24 октябрь куни Ёшлар иттифоқи вилоят кенгаши биносида Хоразм вилоят адлия бошқармаси томонидан бир гуруҳ давлат органлари ва ташкилотларининг юридик хизмат ходимларига аттестация гувоҳномалари тантанали равишда топширилди.

Мазкур аттестация гувоҳномалари Ўзбекистон Республикаси Вазирлар Маҳкамасининг 2007 йил 22 ноябрдаги 244-сонли қарори билан тасдиқланган “Юридик хизматлар ходимларини аттестациядан ўтказиш ва уларнинг малакасини ошириш тартиби тўғрисида”ги Низом талаблари асосида тақдим этилди.

Жорий йилнинг 12 октябрь куни вилоят адлия бошқармасининг ташаббуси билан Аҳолининг ҳуқуқий онгини, ҳуқуқий маданиятини юксалтиришга ҳамда қонунийликни мустаҳкамлашга қаратилган “Ҳуқуқий билимлар куни” флешмоби доирасида ҳуқуқий тарғибот ва маърифат тадбири ўтказилган эди.

“Ҳуқуқий билимлар куни” флешмоби доирасида ўтказилган ушбу тарғибот табиринининг мантиқий давоми жорий йилнинг 18 октябрь куни Урганч шаҳар ҳамда Урганч туман адлия бўлимлари томонидан ўтказилди.

Мазкур тадбир ёшлар иштирокида ташкил этилиб, бугунги кунда ёшларга яратилаётган имкониятлар ва имтиёзлари, шу билан бирга давлатимиз томонидан қабул қилинаётган қонун ҳужжатлари бўйича малака мутахасислар томнидан тушунтириш ишлари олиб борилди.

Тадбир жараёнида адлия органлари томонидан тайёрланган буклет ҳамда флаерлар иштирокчиларга тарқатилди.

Савол беринг - жавоб берамиз!!!

Савол: Қўшкўпир тумани Қотоғон қишлоғида яшовчи фуқаро А.Қутлимуратов томонидан.Айтингчи, яқин қариндошлар, яъни ота-она, эр (хотин), болалар, ака-укалар, опа-сингиллар ўртасида транспорт воситасидан фойдаланиш ва бошқариш тўғрисидаги ишончномаларни нотариал идора орқали расмийлаштириш бекор қилиндими, бу тартиб бекор қилинган бўлса, ишочномани расмийлаштириш қандай тартибда бўлади?

Жавоб: Ўзбекистон Республикаси Президентининг 2019 йил 9 сентябрдаги “Ўзбекистон Республикасида нотариат тизимини тубдан ислоҳ қилиш чора-тадбирлари тўғрисида”ги ПФ 5816-сон Фармонига кўра 2019 йил 1 октябрдан бошлаб транспорт воситаси эгасининг фуқаролик жавобгарлигини мажбурий суғурта қилиш бўйича суғурта полисида кўрсатилган транспорт воситаси эгасининг яқин қариндошлари (ота-она, эр (хотин), болалар, ака-укалар, опа-сингиллар) ўртасида транспорт воситасидан фойдаланиш ва бошқариш тўғрисидаги ишончномаларни мажбурий нотариал тасдиқлаш тартиби бекор қилинди. Агарда транспорт воситасининг эгаси ва ишончнома олувчи шахслар транспорт воситасидан фойдаланиш ва бошқариш тўғрисидаги ишончномаларни нотариал тартибда расмийлаштиришни талаб қилишса, бу холда ишончнома нотариал идора орқали расмийлаштирилиши мумкин. Бунда фақат автотранспорт воситасидан фойдаланиш ва бошқаришда ишончномаларни фақат яқин қариндошлар ўртасида мажбурий расмийлаштириш тартиби бекор қилинди.

Савол: Урганч тумани Чаккашоликор қишлоғи яшовчи фуқаро Ж.Атамуратов томонидан. Ипотека, гаров ва лизинг шартномаларини расмийлаштиришда қандай ўзгаришлар бўлади?

Жавоб: Ўзбекистон Республикаси Президентининг 2019 йил 9 сентябрдаги “Ўзбекистон Республикасида нотариат тизимини тубдан ислоҳ қилиш чора-тадбирлари тўғрисида”ги ПФ 5816-сон Фармони билан 2020 йил 1 январдан юридик шахсларнинг, хусусан банк ва бошқа кредит ташкилотларининг корхонани ижара ва текин фойдаланишга бериш ҳамда бирламчи бозордаги кўчмас мулк ва транспорт воситаларини олишда ипотека, гаров ва лизинг шартномаларини нотариал расмийлаштириш тартиби бекор қилинади. Бунда, гаров (ипотека) шартномаларини расмийлаштирган банк ва бошқа кредит ташкилотлари мол-мулкка тақиқ қўйиш ва тақиқни ечишни ахборот-коммуникация технологияларидан фойдаланган ҳолда «Нотариус» автоматлаштирилган ахборот тизими орқали мустақил амалга оширади.

Хоразм вилоят адлия бошқармаси томонидан Янгибозор тумани, Бўстон маҳалласида яшовчи фуқаро Б.Авезовнинг моддий ёрдам тайинланмаганлигидан норози бўлиб, бу юзадан Ўзбекистон Республикаси Адлия вазирлигининг “ишонч телефони”га қилган мурожаати кўриб чиқилди.

Ўзбекистон Республикаси Вазирлар Маҳкамасининг 2013 йил
15 февралдаги 44-сонли қарори билан тасдиқланган “Кам таъминланган оилаларга ижтимоий нафақалар ва моддий ёрдам тайинлаш ва тўлаш тартиби тўғрисида”ги Низомнинг 1-бўлими, 6-бандида “Фуқаролар йиғини томонидан эҳтиёжманд деб эътироф этилган оила нафақа ёки моддий ёрдамнинг фақат бир турини олиш ҳуқуқига эга” деб кўрсатилган.

Ўрганиш жараёнида, Б.Авезовнинг томонидан турмуш ўртоғи М.Болтаева туманнинг “Бўстон” маҳалла фуқаролар йиғинига 2019 йилнинг сентябрь ойида болали оилаларга нафақа, бола парвариши бўйича нафақа ва моддий ёрдам сўраб қилган мурожаати маҳалла фуқаролар йиғини томонидан ижобий ҳал қилинмаётганлигини билдирган.

Мазкур масала вилоят адлия бошқармасининг аралашуви билан турмуш ўртоғи М.Болтаевага “Бўстон” маҳалла фуқаролар йиғинига Ўзбекистон Республикаси Вазирлар Маҳкамасининг 2013 йил 15 февралдаги 44-сонли қарори билан тасдиқланган “Кам таъминланган оилаларга ижтимоий нафақалар ва моддий ёрдам тайинлаш ва тўлаш тартиби тўғрисида”ги Низомга мувофиқ қилган мурожаати “Бўстон” маҳалла фуқаролар йиғини қошидаги нафақа тайинлаш комиссияси томонидан кўриб чиқилиб, 2019 йилнинг 30 сентябрдаги 3-сонли қарорига асосан жорий йилнинг 1 октябрь кунидан 2020 йилнинг 1 октябрь кунига қадар нафақа пули тайинланиб, Б.Авезовнинг талаби қаноатлантирилди.

Хоразм вилоят адлия бошқармаси томонидан жорий йилнинг
12 октябрь куни Урганч шаҳрида жойлашган “Амир Тимур” истироҳат боғида Аҳолининг ҳуқуқий онгини, ҳуқуқий маданиятини юксалтиришга ҳамда қонунийликни мустаҳкамлашга қаратилган “Ҳуқуқий билимлар куни” флешмоби доирасида ҳуқуқий тарғибот ва маърифат тадбири ўтказилди.

Мазкур тарғибот тадбирида Давлатимиз томонидан қабул қилинаётган қонунлар ва бошқа норматив-ҳуқуқий ҳужжатларнинг мазмун-моҳиятини фуқароларга тушунтириш билан биргаликда, аҳоли учун қизиқарли ва фойдали бўлган муҳим ҳуқуқий маълумотлар, хусусан нотариат, давлат хизматлари, интеллектуал мулк ва сайлов ҳуқуқи ҳамда тадбиркорлик соҳаларидаги ҳуқуқий масалаларга оид маълумотлар берилди.

Тадбирда ҳарбий соҳадаги ислоҳотлар билан таништириш ҳамда давлатимизнинг мустаҳкам ҳимоячилари бўлмиш “Миллий гвардия” аскарлари ҳарбий чиқишлар қилди, шу билан бирга “Темурбеклар мактаби” ёш ўқувчилари томонидан ёшларни ватанпарлик туйғусини янада ошириш бўйича намойиш қилишди.

Ҳуқуқий ва маданий тадбир жараёнида вилоятда фаолият юритаётган адвокатлар, нотариуслар ҳамда давлат хизматлари марказлари ходимлари томонидан бепул ҳуқуқий маслаҳатлар ва сайёр давлат хизматлари кўрсатилиши таъминланди.

Фуқароларни ўтказилган тадбирдан хурсанд қилган яна бир жиҳат шунда бўлдики, Бандлик бош бошқармаси ходимлари томонидан бўш иш ўринлари меҳнат ярмаркаси ташкил қилиниб, мазкур меҳнат ярмаркасида
200 дан ортиқ фуқароларга бўш иш ўринлари бўйича тегишли таклифлар берилди.   

Тадбирда ногиронлиги бўлган шахслар хам иштирок қилиб, ўзлари яратган буюмлари учун савдо ярмаркаси ташкил этилди.

Тадбир жараёнида “Ҳуқуқ билимдонлари”, “Сайлов ҳуқуқшуноси” каби тест синовлари, шунингдек фуқаролар ўртасида ҳуқуқий викториналар хам ўтказилди. Ғолиб бўлган иштирокчиларга вилоят адлия бошқармаси ва бошқарманинг фахрийлар кенгаши раиси томонидан эсдалик совғалари топширилди.

Бундан ташқари, “Ҳуқуқий билимлар куни” флешмоби доирасида ўтказилган тадбир жараёнида вилоятда фаолият юритаётган мутасадди идора ва ташкилотлар томонидан кўргазмали тарғибот тадбирлари, акциялар ўтказилиб, тайёрланган буклет ҳамда флаерлар тадбир иштирокчиларига тарқатилди.

Тадбир кўтаринки руҳда ўтказилиб, тадбир давомида маданият бўлимлари ходимлари томонидан концерт дастурлари орқали чиқишлар қилинди.

Ўтказилган “Ҳуқуқий билимлар куни” флешмоби ҳуқуқий тарғибот ва маърифат тадбири доирасида жами 3000 (уч минг)дан ортиқ фуқаролар қамраб олинди.

Тадбирда иштирок этган фуқароларнинг фикрича, ушбу тадбир унутилмас ва эсда қоларли бўлганлигини, шунингдек шу каби ҳуқуқий тарғибот тадбирларини тез-тез ўтказиб турилишини таклиф сифатида билдиришди.

“Ҳуқуқий билимлар куни” флешмоби доирасида ўтказилган тарғибот тадбири нафақат ҳуқуқий жиҳатдан, балки маданий, маърифий ҳамда юқори кайфиятда ўтказилиб, фуқаролар айниқса ёшлар фаол иштирок этишди.    

Тадбир тафсилотлари маҳаллий телеканаллар томонидан тасвирга олининди.

ХОРАЗМ ВИЛОЯТ АДЛИЯ БОШҚАРМАСИ ТИЗИМИДАГИ

МАВЖУД БЎШ ИШ ЎРИНЛАРИ ҲАҚИДА МАЪЛУМОТ

Ойлик иш ҳақидан ташқари ижтимоий ҳимоялашга қаратилган қуйидаги чоралар ва тўловлар таъминланади:

- ойлик иш ҳақига мартаба даражалари учун ва кўп йиллик хизмати учун қўшимчалар (бундан ташқари, мукофот пули, моддий ёрдам ва бошқалар) қўшиб борилади;

- адлия органлари ходимларига бериладиган махсус унвон – мартаба даражалари берилади;

- ходимларнинг озиқ-овқат харажатларини қисман қоплаш учун ҳар ойлик компенсация тўлови (энг кам ойлик иш ҳақи миқдорида адлия бўлимлари учун);

- ходим таътилга чиққанда икки ойлик иш ҳақи фонди миқдорида моддий ёрдам пули;

- ходимга оилавий шароитига кўра ижтимоий муҳофаза қилиш тарзидаги пул маблағи (энг кам ойлик иш ҳақининг 10 баравари миқдорида);

- қишлоқ хўжалиги маҳсулотлари сотиб олиш учун йилда бир маротаба моддий ёрдам (энг кам ойлик иш ҳақининг 10 баравари миқдорида)

- турли хил концерт ва театрларга чипталар ҳамда санаторий ва бошқа даволаш муассасаларига, шунингдек болалар оромгоҳларига йўлланмалар;

- уй-жой шароитларини яхшилашга муҳтож бўлган ходимларга уй-жой сотиб олиш учун беш йилдан кўп бўлмаган муддатга ва энг кам иш ҳақининг минг баробаридан ошмаган миқдорда фоизсиз қарз ажратиш;

- ходимларга уй-жойларни ижарага олганлик (ижарада турганлик) учун компенсация тўлови;

Танловда иштирок этиш истагини билдирган номзодлар 2019 йил 24 октябрь кунига қадар ўз шахсий варақасини Хоразм вилоят адлия бошқармаси Кадрлар бўлимига юборишлари лозим. Юборилаёган маълумотномада номзоднинг яшаш манзили ва телефон рақамлари тўғрисидаги ҳамда қайси иш ўрнига ҳужжат топшириш истаги ҳақидаги маълумотлар ҳам экс эттирилиши керак.

Мурожаат учун телефон: 0-362-228-65-68

ХОДИМЛАРНИ ИШГА ҚАБУЛ ҚИЛИШНИНГ УМУМИЙ ТАЛАБЛАРИ
ВА ТАНЛОВ ЎТКАЗИШ ТАРТИБИ

Меҳнат кодексининг 72-моддасида меҳнат шартномасини тузиш ҳақидаги келишувдан олдин қўшимча ҳолатлар (танловдан ўтиш, лавозимга сайланиш ва бошқалар) бўлиши мумкинлиги белгиланган. Шунингдек, “Коррупцияга қарши курашиш тўғрисида”ги Қонуннинг 19-моддасига асосан давлат бошқаруви соҳасида коррупциянинг олдини олишга доир чора-тадбирларга давлат органлари ходимларининг шахсий ва касбий сифатлар, очиқлик, беғаразлик, адолатлилик ва холислик принциплари асосида танлов бўйича саралаш тизимини жорий этиш киради.

Шунга кўра, Ўзбекистон Республикаси адлия вазирининг 2018 йил
7 июндаги 185-ум-сон буйруғи билан адлия органлари ва муассаларига ишга қабул қилишнинг танлов ўтказиш тартиби белгиланган.

Унга мувофиқ адлия органлари ва муассасаларига ходимларни ишга қабул қилиш бўйича танлов адлия органлари ва муассасаларининг кадрлар таркибини ишчанлик, шахсий ва ахлоқий фазилатлари, маълумоти даражаси ва соғлиғига кўра юклатилган вазифа ва функцияларни бажаришга лаёқатли бўлган ходимлар билан таъминлаш мақсадида ўтказилади.

Адлия органлари ва муассасаларига жинси, ёши, ирқи, миллати, тили, ижтимоий келиб чиқиши, мулкий ҳолати ва мансаб мавқеи, динга бўлган муносабати, эътиқоди, жамоат бирлашмаларига мансублигидан қатъи назар, ўзининг касбий, ишчанлик, шахсий ва ахлоқий фазилатлари, маълумоти даражаси ва соғлиғига кўра адлия органлари
ва муассасаларига юклатилган вазифаларни бажаришга қодир бўлган Ўзбекистон Республикаси фуқаролари ишга қабул қилинади.

Қонун ҳужжатларида ёки Ўзбекистон Республикаси адлия вазири томонидан тегишли лавозим ёки адлия органлари ва муассасаларининг таркибий бўлинмаси тоифаси ва ўзига хос хусусиятидан келиб чиқиб, лавозимларнинг айрим тоифаларига тайинлаш учун қўшимча талаблар (касбий тайёргарлик даражасига кўра, иш стажи ва ҳоказо) белгиланиши мумкин.

Танлов адлия органлари ва муассасаларининг раҳбарлари томонидан ташкил этиладиган Адлия органлари ва муассасаларига ишга қабул қилиш бўйича махсус комиссия (бундан буён матнда Махсус комиссия деб юритилади) томонидан ўтказилади.

Махсус комиссия тегишли адлия органи ёки муассасаси ходимлари орасидан камида беш кишидан иборат таркибда бир йил муддатга тузилади.

Адлия органлари ва муассасаларида тегишли раҳбар Махсус комиссия раиси ҳисобланади. Махсус комиссия таркибига киритилган раҳбар ўринбосарларидан бири комиссия раиси ўринбосари этиб тайинланади.

Марказий аппаратда комиссия таркиби Ўзбекистон Республикаси адлия вазири томонидан тасдиқланади.

Махсус комиссиянинг ишчи органи бўлиб адлия органлари ва муассасаларининг кадрлар соҳасига масъул таркибий бўлинмаси ҳисобланади. Махсус комиссия йиғилиши аъзоларининг камида 2/3 (учдан икки) қисми қатнашган тақдирда ваколатли ҳисобланади.

Танлов ўтказиш жараёнида номзодлар техник воситалардан фойдаланган ҳолда аудио ва видео ёзувлардан фойдаланиш қатъиян тақиқланади. Ушбу талабни бузган номзодларни ишга қабул қилиш рад этилади.

Танлов қуйидаги босқичлардан иборат:

бўш иш ўрнига танлов ўтказилиши ҳақида эълон бериш;

бўш иш ўрнига ҳужжат топширган номзодларни дастлабки ўрганиш;

номзод билан унинг назарий билимлари ва касбий лаёқатини аниқлаш юзасидан суҳбат ўтказиш;

номзоднинг назарий билимлари ва таҳлил қилиш қобилиятини тест саволлари воситасида баҳолаш (Комиссия ушбу босқични ўтказиш ёки ўтказмаслик масаласини ҳал қилади);

номзодни вазирлик марказий аппарати билан келишиш (адлия органлари
ва муассасаларининг вазирлик номенклатурасига кирадиган лавозимлари бўйича).

Меҳнат кодексининг 57-моддасида ҳар ким иш берувчига бевосита мурожаат қилиш орқали иш жойини эркин танлаш ҳуқуқига эгалиги белгиланган. Шунга кўра, номзод қайси адлия органи ёки муассасасига ишга кириш истаги бўлса,
шу адлия органи ва муассасасига бевосита танловда иштирок этиш ҳақида ариза билан мурожаат қилиши лозим.

Танловда иштирок этиш тўғрисидаги аризага қуйидаги ҳужжатлар илова қилинади:

Ходимнинг шахсий варақаси (сўровнома, анкета ёки маълумотнома-объективка);

диплом (дипломдан кўчирма)нинг нусхаси, чет элда ўқиган бўлса, дипломи нострификациядан ўтганлигини тасдиқловчи гувоҳнома, олий ёки ўрта махсус, касб-ҳунар таълим муассасаларининг битирувчи курсларида таълим олаётганлар бундан мустасно;

номзоднинг паспорт нусхаси.

Танловда қатнашиш учун номзод томонидан тақдим этилган ҳужжатлар қайтарилмайди.

Бундан ташқари, танловдан ижобий натижага эришган номзод томонидан қонун ҳужжатларида белгиланган ишга кириш учун ҳужжатлар рўйхати ўз вақтида тўлиқ тақдим қилинмаганда ёки била туриб сохта ҳужжатлар ёхуд ёлғон маълумотлар тақдим этилган тақдирда номзодни ишга қабул қилиш рад этилади. Ишга қабул қилинган ходим томонидан ишга кириш жараёнида била туриб сохта ҳужжатлар ёхуд ёлғон маълумотлар тақдим этилганлиги аниқланган ҳолларда ходимни хатти-ҳаракатлари юзасидан хизмат текшируви ўтказилади ҳамда унинг хатти-ҳаракатларига ҳуқуқий баҳо берилади.

Танловда иштирок этиш учун тақдим этилган ҳужжатлар Ишчи орган томонидан қабул қилинади.

Ариза ва унга илова қилинган ҳужжатлар белгиланган тартибда тегишли адлия органи ёки муассасасининг девонхонасида рўйхатдан ўтказилади.

Ишчи орган томонидан эълонда белгиланган ҳужжат қабул қилиш муддати тугагандан сўнг 15 календарь кун муддатда номзоднинг ҳужжатлари лавозимга қўйиладиган малака талабларига мувофиқ келиши, заруриятга қараб номзоднинг яшаш жойи, иш жойи ва ўқиш жойидан номзод ҳақидаги маълумотларни дастлабки тарзда ўрганиб чиқилади. Ўрганиб чиқиш натижаларига кўра, Ишчи орган томонидан Махсус комиссия раиси билан келишилган ҳолда танлов ўтказиш кунини белгилайди ва номзодга танлов ўтказиш вақти ва жойи ҳақида алоқа воситалари (қоида тариқасида телефон орқали) орқали етказилади.

Ўрганиш жараёнида номзодни адлия органлари ва муассасаларига ишга қабул қилиш учун тўсқинлик қилувчи ҳолатлар қонун ҳужжатларида мавжудлиги аниқланса, номзодга бу ҳақда мурожаат қилувчининг сўровига асосан алоқа воситалари орқали ёзма ёки оғзаки асослантирилган жавоб берилади.

Махсус комиссия томонидан номзоднинг назарий билимлари ва касбий лаёқатини аниқлаш юзасидан суҳбат ўтказилади.

Комиссия суҳбат жараёнида номзоднинг соҳадаги тегишли тайёргарлиги ва малакасини, шунингдек касбий лаёқати даражаси, маънавий фазилатлари, қобилиятини аниқлайди. Суҳбат жараёнида номзодга лавозим хусусиятидан келиб чиқиб компьютер саводхонлигининг минимал даражаси бўйича талабларга мувофиқлиги бўйича, шунингдек унинг шахсий ҳужжатларида келтирилган маълумотларни аниқлаштириш юзасидан саволлар ҳам берилиши, шунингдек, танлов эълон қилинган бўш иш ўрнининг хусусиятидан келиб чиққан ҳолда бошқа соҳа мутахассислари ҳам номзодга саволлар бериш ва жавоблар бўйича ўз хулосасини баён этиш учун овоз бериш ҳуқуқисиз таклиф этилиши мумкин.

Шунингдек, номзоднинг орфографик ва пунктуацион саводхонлигини баҳолаш мақсадида ёзма иш – диктант олиниши мумкин.

Номзод билан ўтказилган суҳбат натижасида ишга ёки жамоатчи ёрдамчиликка қабул қилиш рад этилган, шунингдек танловда иштирок этиши рад этилган ёки вазирлик томонидан маъқулланмаган (адлия органлари ва муассасаларининг вазирлик номенклатурасига кирувчи лавозимлар бўйича) номзод камида уч ойдан кейин такроран мурожаат қилиши мумкин.

Қуйидаги шахслар адлия органлари ва муассасаларига ишга қабул қилинмайди:

Ўзбекистон Республикаси фуқароси бўлмаган шахслар;

ўн олти ёшга тўлмаган шахслар;

белгиланган тартибда муомалага лаёқатсиз ёки муомала лаёқати чекланган
деб топилган шахслар;

илгари ўз касбий фаолиятига мос келмайдиган қилмишлар содир этганлиги учун олдинги иш жойидан белгиланган тартибда бўшатилган шахслар;

адлия органи ёки муассасасининг ишлаб турган ходими билан яқин қариндош
ёки қуда-анда бўлса (ота-оналар, ака-укалар, опа-сингиллар, фарзандлар, эр-хотинлар, шунингдек эр-хотинларнинг ота-оналари, ака-укалари, опа-сингиллари ва фарзандлари), агар ишга қабул қилинаётган ёки тайинланаётган лавозим улардан бири иккинчисига бевосита бўйсуниб ёки унинг назорати остида хизмат қилишни тақозо қилса;

ишга кириш учун сохта ҳужжатлар ёки била туриб ёлғон маълумотлар тақдим этган бўлса;

қонун ҳужжатларида белгиланган бошқа ҳолатлар.