Yangiliklar
Жорий йилнинг 12 сентябрь куни Ўзбекистон Республикаси Адлия вазири ўринбосари Махмуджон Шухратович Истамов бошчилигида Шовот, Гурлан, Урганч ҳамда Кўшкўпир туман адлия бўлимларига хизмат автотранспорт воситаларини тантанали равишда топшириш маросими бўлиб ўтди.
Жорий йилнинг 12 сентябрь куни вилоят адлия бошқармаси ҳамда вилоят божхона бошқармаси ходимлари билан биргаликда Мухаммад Ал-Хоразмий номидаги Тошкент Ахборот Технологиялари Университети Урганч филиали ҳамда Тошкент Тиббиёт Академияси Урганч филиалида Ҳуқуқий тарғиботнинг замонавий усулларидан фойдаланиш ва уларни оммалаштириш ҳамда Адлия вазирлигининг “Huquqiy axborot” телеграм каналига филиал ўқитувчи ва талабаларни аъзо бўлишлари мақсадида ҳуқуқий тарғибот тадбири ўтказилди. Мазкур тарғибот тадбирларида 3 мингдан ортиқ ўқитувчи ва талабалар қамраб олинди. Тарғибот жараёнида “Huquqiy axborot” телеграм каналига аъзо бўлиш “Ихтиёрийлик” принципи асосида ўтказилди. Тадбир тавсилотлари “8 ТВ” маҳаллий телеканал орқали тасвирга олинди. Бундан ташқари “Huquqiy axborot” телеграм каналини оммабоплигини ошириш мақсадида маҳаллий телеканаллар, шу жумладан “Хоразм”, “8 ТВ” ҳамда “S-Iqbol” телеканаллари орқали видеороликлар хар куни 4-5 маротаба мунтазам равишда эфирга узатилмоқда.
Ўзбекистон Республикаси Президентининг 2018 йил 4 майдаги “Мамлакатни демократик янгилаш жараёнида фуқаролик жамияти институтларининг ролини тубдан ошириш чора-тадбирлари тўғрисида”ги ПФ-5430-сонли Фармонига мувофиқ Республикада биринчилардан бўлиб Хоразм вилоятида “Нодавлат нотижорат ташкилотлар уйи” ташкил этилди.
Шу муносабат билан жорий йилнинг 6 сентябрь куни Хоразм вилояти Урганч шаҳри Ўзбекистон кўчаси 31/1-уй жойлашган бинода “Нодавлат нотижорат ташкилотлар уйи”нинг тантанали очилиш маросими бўлиб ўтди.
Очилиш маросимида вилоят ҳокими, Олий мажлис сенати аъзолари ва қонунчилик палатаси депутатлари, Адлия вазирлиги бошқарма бошлиғи ва ҳудудий давлат органларининг раҳбарлари ҳамда маъсул ходимлари, шунингдек ННТлар раҳбарлари ва ОАВ ходимлари иштирок этдилар.
Ушбу бинога ижтимоий аҳамиятга эга бўлган соҳаларда ўз фаолиятини амалга ошираётган ва бинога муҳтож нодавлат нотижорат ташкилотларини ижара тўловининг “ноль” ставкасини қўллаган ҳолда Ўзбекистон корейс, рус, татар, қозоқ маданий марказлари, шунингдек Ўзбекистон ногиронлари жамияти, Ўзбекистон экологик ҳаракати, Ўзбекистон Чернобилчилари Ассоциацияси, Ўзбекистон Қизил ярим ой жамияти вилоят бўлинмалари ва бошқа ННТлар, жами 19 таси жойлаштирилди.
Жорий йилнинг 14 август куни Хоразм вилоят телерадиокомпанияси биносида Ўзбекистон Республикаси Президентининг “Ўзбекистон Республикасида инвестиция муҳитини тубдан яхшилаш чора-тадбирлари тўғрисида”ги Фармонининг мазмун-моҳияти ва аҳамиятига қаратилган ток-шоу ўтказилди.
Мазкур ток-шоуда вилоят адлия бошқармаси бошлиғининг ўринбосари, вилоят прокуратураси, вилоят божхона бошқармаси, вилоят давлат солиқ бошқармаси, вилоят архитектура ва қурилиш бош бошқармаси хамда вилоят ер ресурслари ва давлат кадастри бошқармаси ходимлари иштирок этишди.
Ток-шоуда Ўзбекистон Республикаси Президентининг “Ўзбекистон Республикасида инвестиция муҳитини тубдан яхшилаш чора-тадбирлари тўғрисида”ги Фармонининг мазмун-моҳияти ва аҳамияти, унда белгиланган “Ишончни ҳимоя қилиш принципи”, қўшимча кафолатлар, номарказлашган ваколатлар, соддалашган жараён, экспортга рағбат, виза имтиёзлари хамда истиқболдаги вазифалар хақида фикрлар алмашилди.
Жорий йилнинг 9 август куни Хонқа туман ҳокимлиги биносида Ўзбекистон Республикаси Президентининг “Ўзбекистон Республикасида инвестиция муҳитини тубдан яхшилаш чора-тадбирлари тўғрисида”ги Фармонининг мазмун-моҳияти ва аҳамиятига қаратилган тадбир бўлиб ўтди.Тадбирда туман адлия бўлими, туман ҳокимлиги, туман прокуратураси, туман ИИБ ва бошқа идора ва ташкилотлар ходимлари ҳамда оммавий ахборот воситалари ходимлари иштирок этишди.
Тадбир иштирокчиларига Ўзбекистон Республикаси Президентининг “Ўзбекистон Республикасида инвестиция муҳитини тубдан яхшилаш чора-тадбирлари тўғрисида”ги Фармонининг мазмун-моҳияти ва аҳамияти, унда белгиланган вазифа ва янгиликлар таҳлилий тарзда тушунтирилди.
Очиқ мулоқот тарзида ўтказилган тадбир тафсилотлари маҳаллий телеканал томонидан тасвирга олинди, йиғилиш иштирокчилари фаол иштирок этишди ҳамда ўз фикр мулоҳазаларини билдиришди.
Жорий йилнинг 16 август куни Хоразм вилояти Гурлан туман адлия бўлимининг ташаббуси билан Шовот, Янгибозор ва Кўшкўпир туман адлия бўлимлари хамкорлигида Ўзбекистан Республикаси Президентининг
2017 йил 3 июндаги "Жисмоний тарбия ва оммавий спортни янада ривожлантириш чора-тадбирлари тўғрисида"ги ПҚ-3031-сонли қарори ижроси бўйича "Хар бир бола қонун химоясида" шиори остида спортнинг Баскетбол тури бўйича умумий ўрта таълим мактабларининг 10-11-синф ўкувчилари ўртасида "Адлия кубоги" мусобақаси ташкил қилиниб, ушбу мусобақа Гурлан туманидаги 6-сон умумий ўрта таълим мактабида ўтказилди. Ўтказилган Баскетбол мусобақасида ёшлар фаол иштирок қилди ва мусобақа иштирокчиларига адлия бўлимларининг қимматбаҳо савғалари топширилди.
Ўзбекистон Республикаси Адвокатлар палатаси Хоразм вилоят ҳудудий бошқармаси билан ҳамкорликда жорий йилнинг 7 август куни вилоятдаги адвокатлар билан “Адвокатура институти бўйича амалга оширилаётган ислоҳотлар янада такомиллашмоқда” мавзусида йиғилиш ўтказилди.
Йиғилишда, 2018 йилнинг 12 май куни Ўзбекистон Республикаси Президентининг “Адвокатура институти самарадорлигини тубдан ошириш ва адвокатларнинг мустақиллигини кенгайтириш чора-тадбирлари тўғрисида”ги ПФ-5441-сонли Фармони ҳақида тўхталиб ўтилди.
Мазкур Фармонга кўра мамлакатимиздаги адвокатура институтининг ҳозирги ҳолати ҳақида сўз юритилиб, амалиётдаги мавжуд камчилик ва муаммолар ҳамда уларга ечим топиш мақсадида адвокатура институти фаолият механизмига бир қанча ўзгартиришлар киритилганлиги маълум қилинди.
Ушбу ислоҳотлар жумласига адвокат низоларни судгача ҳал қилиш, томонларни яраштириш бўйича чоралар кўриш, шунингдек, ҳакамлик судьяси сифатида фаолият юритиш ҳуқуқига эга бўлганлиги;
- адвокатлик фаолияти билан шуғулланиш ҳуқуқини берувчи лицензияни олиш учун адвокатлик тузилмасида мажбурий стажировка ўташ муддати олти ойдан уч ойга қисқартирилганлиги;
- камида уч йил давлат органлари ва ташкилотларининг юридик хизмати ходимлари ва судья, терговчи ёки прокурор лавозимида фаолият юритган шахслар мажбурий стажировкадан озод этилиши;
- лицензияни тугатиш учун асос бўладиган адвокат томонидан узрли сабабларсиз ўз касб мажбуриятларини бажармаслик муддати амалдаги уч ойдан олти ойга узайтирилиши;
- лицензиянинг амал қилишини тугатиш фақат суд томонидан амалга оширилиши;
- адвокат мақомини олиш бўйича малака имтиҳонини такроран топшириш муддати бир йилдан олти ойгача қисқартирилиши белгиланган.
Шуниндек, адвокатлар ўзларининг ҳимояси остидаги шахслар билан аудио ва видеокузатув қурилмалари бўлмаган махсус хоналарда ҳамда бегона шахсларнинг иштирокисиз ўз вақтида ва ҳеч қандай тўсиқларсиз учрашиши таъминланганлиги, адвокатларнинг сўровлари давлат ва бошқа органлардан ҳамда корхона, муассаса ва ташкилотлар томонидан сўров қабул қилинган пайтдан бошлаб кўпи билан ўн беш кун муддатда бажарилиши шартлиги, бундай сўровларни ижро этмаслик, ёлғон ёки нотўғри маълумотларни тақдим этганлик учун адвокат айбдор мансабдор шахсларни маъмурий жавобгарлик масаласини кўриб чиқиш масаласида тўғридан-тўғри судларга мурожаат қилиши мумкинлиги, шунингдек, 2018 йил 1 августдан бошлаб тижорат ташкилотлари юридик маслаҳат хизматларини лицензия олмасдан Вазирлар Маҳкамаси томонидан белгиланган тартибда амалга оширилиши белгиланганлиги таъкидланди.
Ҳуқуқий хизмат кўрсатишни
давлат томонидан тартибга
солиш бўлими бошлиғи
А.Маҳмудов
Жорий йилнинг 7 август куни Ёшлар Иттифоқи Хоразм вилояи Кенгаши биносида Ўзбекистон Республикаси Президентининг “Ўзбекистон Республикасида инвестиция муҳитини тубдан яхшилаш чора-тадбирлари тўғрисида”ги Фармонининг мазмун-моҳияти ва аҳамиятига қаратилган матбуот анжумани
бўлиб ўтди.
Матбуот анжумани вилоят адлия бошқармаси, Давлат хизматлари агентлиги вилоят бошқармаси, идора ва ташкилотларнинг юридик хизмат ходимлари ҳамда оммавий ахборот воситалари ходимлари иштирокида ташкил қилинди.
Давлат органлари ва мансабдор шахслар ҳокимият вакиллари ҳисобланади. Улар ўз вазифаларини давлат номидан амалга оширишади. Аҳоли ва тадбиркорлик субъектлари давлат органлари томонидан қабул қилинган қарорларни давлатнинг қарори деб билишади ва унга ишонч билдиришади.
Демак, ҳар қандай маъмурий қарор давлатнинг айтган сўзи деб тушунилади. Инвестор ёки тадбиркор маъмурий ҳужжат асосида давлатга ишониб, ўз маблағларини маълум бир фаолият турига йўналтиради.
Бироқ, қонун ҳужжатларидаги айрим бўшлиқлар туфайли қатор муаммолар юзага келаётгани сир эмас. Маъмурий ҳужжатларнинг баъзи сабабларга кўра юқори турувчи орган томонидан ёки шу ҳужжатни қабул қилган органнинг ўзи томонидан бекор қилиниши, суд томонидан ҳақиқий эмас деб топилиши каби ҳолатлар кузатилади. Бундай ҳолларда бекор қилинган маъмурий ҳужжатга ишониб ўз фаолиятини бошлаган тадбиркор ёки инвестор зарар кўриб қолар ва бу зарар қоплаб берилмас эди.
Ер участкаларини давлат ва жамоат эҳтиёжлари учун олиб қўйиш амалиёти ҳам ачинарли аҳволда эди. Хусусан, жорий йилда адлия органлари томонидан давлат ва жамоат эҳтиёжлари учун ер участкаларини олиб қўйилишида қонун ҳужжатларига риоя этилиши аҳволи ўрганилганда, ўтган икки йил ичида республика бўйича 4 689 та турар ва 1 456 та нотурар жойлар бузилганлиги, ер участкаларини олиб қўйишда айрим ҳокимликлар томонидан қонунчилик талабларига риоя этилмагани аниқланди.
Жумладан, 688 та ҳолатда бузилган турар жой эгалари олдиндан ёзма равишда хабардор қилинмаган, 985 та ҳолатда хабардор қилиш муддатига риоя қилинмаган. Шу билан бирга, қонун ҳужжатларига зид равишда 100 та ҳолатда бузилган турар жойлар учун баҳоланмасдан компенсация тўланган ҳамда 391 та ҳолатда эса турар жойлар бузилгандан кейин баҳоланган.
Бундан ташқари, республика бўйича турар жойлари бузилган 37 нафар мулкдорга – 3 млрд 252 млн сўм компенсация тўлови умуман тўланмаган,
215 нафарига эса – 15 млрд 67 млн сўм компенсация тўлиқ тўлаб берилмаган.
Шу каби қонун бузилишларини бартараф этиш ва мулк дахлсизлиги кафолатларини кучайтириш мақсадида Ўзбекистон Республикаси Президентининг “Ўзбекистон Республикасида инвестиция муҳитни тубдан яхшилаш
чора-тадбирлари тўғрисида”ги Фармони қабул қилинди.
Фармонга мувофиқ қатор кафолат ва имтиёзлар яратилди. Хусусан:
Фармонда биринчи марта “Ишончни ҳимоя қилиш принципи” тушунчаси қўлланилди. Унга кўра давлат органининг маъмурий ҳужжати ҳақиқий эмас деб топилса ёки бекор қилинса, унинг натижасида инвестор ва тадбиркорга етказилган мулкий зарарнинг ўрни қоплаб берилади.
Инвестор ва тадбиркорнинг қонуний манфаатларига дахлдор бўлган маъмурий ҳужжатни бекор қилиш ёки унга ўзгартириш киритиш фақат суд томонидан амалга оширилиши белгиланди. Илгари туман ҳокими ўзи чиқарган қарорга ўзи ўзгартириш киритиш ҳуқуқига эга бўлган. Бу коррупцион ҳолатларнинг пайдо бўлишига олиб келар эди. Эндиликда инвестор ва тадбиркорлар судда ўзларининг манфаатларини томонларнинг тенглиги принципи асосида ҳимоя қилиш имконияти эга бўлдилар.
Фармонга кўра, давлат ва жамоат эҳтиёжлари учун ер участкаларини олиб қўйиш тўғрисида қарор қабул қилишдан аввал манфаатдор шахслар билан очиқ муҳокама ўтказилади, шунингдек фойда ва харажатлар баҳоланади. Фақат шундан кейингина ер участкаларини олиб қўйиш тўғрисида қарор қабул қилиниши мумкин. Ушбу тартиб жорий йилнинг 1 сентябридан бошлаб кучга кириши белгиланди.
Ушбу Фармонни қабул қилиниши иқтисодиётини юксалтириш, замонавий техника ва технологиялар билан жиҳозланган янги корхоналарни барпо этиш ва реконструкция қилиш учун хорижий инвестицияларни жалб қилишда катта олға қадам қўйилганлигидан далолат беради.
Тадбир очиқ мулоқот тарзида ўтказилиб йиғилиш иштирокчилари фаол иштирок этишди.
Хоразм вилоят
адлия бошқармаси
Ҳуқуқий тарғибот ва
маърифат бўлими
Жорий йилнинг 3 август куни “Демократия ва инсон ҳуқуқлари” нодавлат Институти томонидан Хоразм вилоят адлия бошқармаси билан ҳамкорликда “Ўзбекистонда суд-ҳуқуқ идоралари фаолияти ҳамда фуқароларнинг ҳуқуқий ислоҳотларга оид ҳабардорлигини оширишда оммавий ахборот воситаларининг роли” мавзусида семинар-тренинг ташкил қилинди.
Семинар-тренингда Хоразм вилоятидаги туман (шаҳар) адлия бўлимлари раҳбарлари, ҳуқуқ-тартибот идоралари вакиллари, вилоятда фаолият юритаётган оммавий ахборот воситалари вакиллари, “Демократия ва инсон ҳуқуқлари” Институтининг вилоят филиали раҳбарлари иштирок этишди.
Мазкур семинар-тренинг Ўзбекистон Республикаси Олий Мажлиси ҳузуридаги ННТ ва бошқа фуқаролик жамиятлари институтларини молиявий қўллаб-қувватлаш жамғармасининг молиявий ёрдамида ташкил этилди.
Семинар-тренингда мамлакатимиздаги суд-ҳуқуқ ислоҳотлари, хусусан Хоразм вилоятидаги суд идораларининг ва оммавий ахборот воситалари олиб бораётган ишлари таҳлил қилиниб, ўзаро тажриба алмашилди.
Ўзбекистонда давлат мустақиллигига эришилгач, суд ҳокимиятининг фаолияти жамиятда ижтимоий адолатни ўрнатиш, қонун устуворлигини таъминлаш, инсон ҳуқуқлари ва қонуний манфаатларини муҳофаза этишга қаратилди. Мамлакатимизда амалга оширилаётган суд-ҳуқуқ ислоҳотлари туфайли ижобий натижаларга эришилмоқда. Ва бу соҳада ҳали бажарилиши лозим бўлган қатор вазифаларга хусусан, фуқароларнинг суд ҳимоясидан фойдаланиш ҳуқуқини янада кучайтиришга юксак эътибор қаратилмоқда.
Мазкур семинар-тренингда мамлакат Президенти томонидан
2017-2021 йилларга мўлжалланган Ўзбекистон Республикасини янада ривожлантириш бўйича Ҳаракатлар стратегиясида белгилаб қўйилган, мақсад ва вазифалари, унинг демократик ислоҳотларни чуқурлаштириш, кучли фуқаролик жамиятини шакллантириш, инсон ҳуқуқ ва эркинликларини ҳимоя қилиш, фуқароларнинг долзарб муаммоларини ҳал этишда давлат органларининг аҳоли билан очиқ, тўғридан-тўғри мулоқотини кучайтириш, аҳоли фаровонлигини ошириш, жамиятда қонун устуворлиги, қонунийлик ва адолатни, мамлакатимизда тинчлик-осойишталик, миллатлараро, фуқаролараро тотувликнинг қарор топишига йўналтирилганини кенг тарғиб қилиб борилишини, аҳолининг ҳуқуқий маданиятини ошириш каби вазифаларга тўхталиб ўтилди.
Фуқароларнинг долзарб муаммоларини ҳал этишда давлат органларининг аҳоли билан очиқ, тўғридан-тўғри мулоқотини кучайтиришда Халқ қабулхоналари фаолиятининг роли ҳам жуда катта аҳамиятга эга бўлаётганига алоҳида тўхталиб ўтилди.
Семинар-тренингда “Демократия ва инсон ҳуқуқлари” институти директори С.А.Ходжаева, Ўзбекистон Миллий университети журналистика факультети профессори, филология фанлари доктори, “Демократия ва инсон ҳуқуқлари” Институтининг эксперт гуруҳи раҳбари Ё.М.Маматова, Хоразм вилояти Адлия бошқармаси бошлиғи ўринбосари Ф.И.Эшназаров ва Хоразм вилоят Матбуот ва ахборот бошқармаси бошлиғи Д.З.Бекчановалар табрик сўзи билан чиқдилар.
Семинар-тренингда “Ўзбекистонда суд-ҳуқуқ ислоҳотларини ҳаётга татбиқ этиш масалалари”, “Ўзбекистонда суд-ҳуқуқ идоралари фаолияти ва ОАВ билан ҳамкорликни ошириш масалалари” ва “Ҳуқуқ соҳасидаги амалга оширилаётган ислоҳотлар хусусидаги фуқароларнинг ҳабардорлигини оширишда суд ва бошқа ҳуқуқ-тартибот органлари ҳамда ННТнинг ОАВ билан ўзаро ҳамкорлик механизмлари” мавзуларида маърузалар қилинди.
Шунингдек, иштирокчилар томонидан кичик гуруҳлар ташкил қилиниб “Суд, адлия, прокуратура ҳамда ички ишлар органлари фаолияти очиқлигини таъминлашда анъанавий ва янги ОАВ роли”, “ОАВда ҳуқуқий мавзуни ёритишнинг шакл ва усуллари. Журналист суриштирувини амалга ошириш тамойиллари”, “Ҳуқуқий мавзуни ёритишда журналист фаолиятининг аҳлоқий меъёрлари” мавзуларида музокаралар олиб борилиб, Суд ҳуқуқ органлари ва ОАВ ўртасидаги кенг ҳамкорлик бўйича қўшма медиа режалар ишлаб чиқилди.
Жорий йилнинг 1 август куни Урганч туманидаги 29-сон умумий ўрта таълим мактабда “Миссионерлик ва прозелетизмнинг салбий оқибатлари, уни олдини олишнинг ҳуқуқий асослари” мавзусида тадбир ўтказилди.
Мазкур тадбирда вилоят адлия бошқармаси, вилоят ҳокимлиги, вилоят ИИБ ва вилоят “Ёшлар иттифоқи” масъул ходимлари, оммавий ахборот воситалари, тумандаги ёшлар ва ўқитувчилар иштирок этди.
Тадбирда ҳозирги кунда миссионерлик ва прозелетизмнинг салбий оқибатлари, миллий қонунчилигимизда диний бағрикенглик ўрнатилганлиги, миссионерлик ва прозелетизм тақиқланганлиги, ушбу ноқонуний ҳаракатлар учун жавобгарлик масалалари, юртимизда мазкур ҳолатлар бўйича рўй берган воқеа ва ҳодисалар тўғрисидаги маълумотлар тадбир иштирокчиларига етказилиб, ушбу ҳолатлар бўйича ишланган видеоролик намойиш этилди.