Янгиликлар
17
Xorazm viloyat adliya boshqarmasining navbatdagi kengaytirilgan hay’at majlisi bo‘lib o‘tdi.
Unda 2025-yilning 9 oyi davomida adliya boshqarmasi va uning tizimidagi idoralar tomonidan amalga oshirilgan ishlar, yo‘l qo‘yilgan kamchiliklar va kelgusidagi vazifalar muhokama etildi.
Yig‘ilishda norma ijodkorligi, huquqiy va davlat xizmatlari ko‘rsatish, murojaatlar bilan ishlash, huquqiy axborotni tarqatish va boshqa sohalar kesimida tahliliy maʼlumotlar keltirildi.
Xususan, tizimda har bir boshqaruv xodimi kesimida faoliyat samaradorlik ko‘rsatkichlarining (KPI) belgilanganligi sababli bir qator yo‘nalishlarda ijobiy natijalar qayd etildi. Xususan:
mahalliy davlat hokimiyati organlarining normativ xususiyatga ega bo‘lgan 362 ta qaror loyihalari huquqiy ekspertizadan o‘tkazilib, ularning 325 tasiga rasmiy rozilik berildi;
“Huquqiy mahalla” loyihasi doirasida aholining 64 642 ta muammosi hal etilib, 11 414 ta birlamchi bepul yuridik yordam ko‘rsatildi hamda 700 dan ortiq protsessual hujjat loyihasi tayyorlab berildi;
Hisobot davrida boshqarma va uning tizimidagi idoralar tomonidan jami 2750 ta murojaatlar ko‘rib chiqilib, shundan 1862 tasi (68 foizi) qanoatlantirildi.
Aholining huquqiy ongi va huquqiy madaniyatini yuksaltirish maqsadida yangi qabul qilingan qonun hujjatlarning mazmun-mohiyatini aholiga yetkazishga qaratilgan 27 mingdan ortiq huquqiy targ‘ibot tadbirlari o‘tkazilib, ushbu ko‘rsatkich o‘tgan yilning mos davriga nisbatan 35 foiz oshdi.
Intellektual mulk huquqlarini himoya qilish sohasida 234 ta tovar va xizmat ko‘rsatish belgilari, tovar kelib chiqqan joy, ixtiro, foydali model va sanoat namunalari kabilarga talabnoma topshirishga ko‘maklashildi.
O‘tkazilgan 473 ta o‘rganishlar natijasida 62 mingdan ortiq qonunbuzilishi holatlari aniqlanib, ularni bartaraf etish maqsadida tegishli mansabdor shaxslar nomiga 667 ta taqdimnoma, 841 ta ogohnoma kiritildi va 172 nafar shaxs intizomiy javobgarlikka tortildi;
Aybdor shaxslarni ma’muriy javobgarlikka tortish bo‘yicha sudlarga va boshqa vakolatli organlarga kiritilgan 409 ta ma’muriy bayonnomalar va takliflar asosida 405 nafar shaxslarning ma’muriy javobgarlik masalasi hal etildi.
Mansabdor shaxslarning 1108 ta noqonuniy qarorlari bekor qilinishi yoki ijrosi to‘xtatilishi ta’minlandi;
Davlat xizmatlari markazlari tomonidan hisobot davrida 820 mingga yaqin davlat xizmatlari ko‘rsatildi. Xizmatlar soni o‘tgan yilning mos davriga nisbatan 25 foiz oshdi.
Davlat organlari va tashkilotlarga kiritilgan ta’sir choralar va sudlarga kiritilgan da’vo arizalar natijasida fuqarolar va tadbirkorlik subyektlari foydasiga 9 mlrd so‘mdan ortiq miqdorida pul mablag‘lari undirib berildi;
Yuridik xizmat ko‘rsatish sohasida 2025-yilning 9 oyi davomida ko‘rsatilgan xizmatlar natijasida davlat idoralarining 466 mingdan ortiq hujjat loyihalari huquqiy ekspertizadan o‘tkazildi.
Yuridik xizmat ko‘rsatiladigan tashkilotlarning manfaatini ko‘zlab sudgacha hal etish yuzasidan jami 127 ta talabnomalar va sudlarga jami 52 ta da’vo arizalar kiritilishi ta’minlandi.
Yig‘ilishda “Yashirin iqtisodiyotga qarshi kurashish oyligi” va “Kibermadaniyatni yuksaltirish oyligi” doirasida hamda korrupsiyaga qarshi kurashish, maishiy korrupsiyani oldini olish borasida amalga oshirilayotgan ishlarni yanada jonlantirish masalalariga alohida urg‘u berildi.
Hay’at majlisi yakunlari bo‘yicha kelgusida adliya organlari tomonidan amalga oshirilishi lozim bo‘lgan ustuvor vazifalar belgilab olindi.