Янгиликлар
Тадбиркорлар ҳимоясида янги босқич
Мамлакатимизда хусусий мулк, кичик бизнес ва хусусий тадбиркорлик фаолияти, уни ҳар томонлама ривожлантириш, сифат жиҳатидан янги босқичга кўтариш ўта муҳим вазифалардан саналади.
Ўтган йиллар давомида мамлакатимизда олиб борилган ислоҳотлар туфайли мазкур соҳанинг қонунчилик механизми такомиллашиб, тадбиркорлик фаолияти эркинлигининг ҳуқуқий кафолатлари, ушбу фаолият билан шуғулланиш учун қулай шарт-шароитлар яратилиши таъминланди.
Ўзбекистон Республикаси Президенти томонидан 2016 йил 5 октябрь куни қабул қилинган “Тадбиркорлик фаолиятининг жадал ривожланишини таъминлашга, хусусий мулкни ҳар томонлама ҳимоя қилишга ва ишбилармонлик муҳитини сифат жиҳатидан яхшилашга доир қўшимча чора-тадбирлар тўғрисида”ги ПФ-4848-сонли Фармон мамлакатимизда келгусида хусусий мулк, кичик бизнес ва хусусий тадбиркорликнинг ривожланишида, инвестициявий жозибадорликни таъминлашда навбатдаги муҳим қадам бўлди.
Шу муносабат билан Хоразм вилоят адлия бошқармаси ташаббуси билан бошқарма биносида барча назорат қилувчи, суд ва ҳуқуқни муҳофаза қилувчи органлар вакиллари ҳамда тадбиркорлик субъектлари иштирокида семинар ташкил этилди. Семинар давомида ушбу Фармоннинг мазмун-моҳияти юзасидан мутахассисислар томонидан фикр ва тажриба алмашинилди.
Мазкур соҳада амалга оширилаётган ислоҳотлар самарасини бугунги кунга келиб тадбиркорлик субъектларининг сони йилдан-йилга ошиб бораётганлиги, миллий иқтисодиётимизда кичик бизнес ва хусусий тадбиркорлик улушининг ортиб бораётганлиги, ички бозорни рақобатбардош ва сифатли товарлар билан тўлдирилаётгани, замон талабларини инобатга олган ҳолда хизматлар кўрсатиш соҳасининг кенгайиши, экспорт таркибида жаҳон бозорларида харидоргир, юқори қийматга эга маҳсулотларнинг кўпайиши, янги иш ўринларининг яратилиши ва шу асосда аҳоли даромади ҳамда фаровонлиги ошиб бораётганлиги, мамлакатимизнинг халқаро рейтингда юқори поғоналарга эришаётганлигида кўришимиз мумкин.
Мазкур Фармон билан кичик бизнес ва хусусий тадбиркорликка кенг эркинлик бериш, улар фаолиятига давлат органлари аралашувини тубдан қисқартириш, ҳуқуқбузарликларнинг барвақт олди олинишини таъминлаш, уларнинг профилактикаси самарадорлигини ошириш ва ҳуқуқбузарликка йўл қўймаслик тадбиркорлик фаолиятини янада ривожлантириш соҳасида давлат сиёсатининг муҳим устувор йўналиши ва давлат органларининг биринчи даражали вазифаси этиб белгиланди.
Эндиликда давлат органларига айбдор ходимларга нисбатан нафақат интизомий, маъмурий ёки жиноий жавобгарликнинг энг қатъий чораларини қўллаш, балки тадбиркорлик субъектларига етказилган зарарни бевосита ушбу ходимлардан ундирилишини таъминлаш мажбурияти ҳам юклатилади.
Ушбу чора-тадбирлар ноқонуний текширишларни ташкил этишга ва уларни ўтказишга, айниқса, давлат органлари ходимларининг ноқонуний хатти-ҳаракатлари оқибатида тадбиркорлик субъектларининг фаолияти асоссиз тўхтатилишига ва уларга зарар етказилишига йўл қўймасликка йўналтирилган.
Шунингдек, мазкур Фармонга мувофиқ 2017 йилнинг 1 январидан бошлаб тадбиркорлик фаолияти субъектлари учун текширишларни қисқартириш, уларнинг жавобгарлигини либераллаштириш билан боғлиқ қулайликлар ҳамда янги 
имтиёзлар жорий этилиши кўзда тутилмоқда. Ушбу қоидаларни амалда рўёбга чиқариш мақсадида бешта энг устувор йўналиш бўйича 42 та аниқ чора-тадбир амалга оширилишини назарда тутувчи Комплекс чора-тадбирлар дастури тасдиқланган.
Ҳозирги кунда тегишли манфаатдор давлат органлари томонидан мазкур Комплекс чора-тадбирлар дастурида белгиланган вазифаларни бажаришга киришилган.
Келгусида амалиётга жорий этилиши кўзда тутилаётган бундай қулайлик ва шароитлар кичик бизнес ва хусусий тадбиркорлар, шунингдек барча тадбиркорлик субъектлари учун ўз фаолиятини эркин амалга ошириш ва уларнинг ривожланишига катта маънавий куч ва далда бўлиши, бизнесни юритиш ва инвестициявий жозибадорлик, мамлакатимизнинг халқаро рейтинги ҳамда аҳоли фаровонлигининг янада ошишига хизмат қилади.
