Янгиликлар

ҲАЙЪАТ МАЖЛИСИ

Хоразм вилоят адлия бошқармасида 2015 йилги фаолият муҳокамасига бағишланган кенгайтирилган Ҳайъат йиғилиш бўлиб ўтди.

Унда бошқарма ходимлари, унинг тизимидаги давлат нотариал идоралари ва ФҲДЁ органлари мудирлари шунингдек ОАВ ходимлари иштирок этишди.

Йиғилишда бошқарма томонидан 2015 йил давомида амалга оширилган ишлар, эришилган ютуқлар ва йўл қўйилган камчиликлар атрофлича муҳокама қилинди.

Таъкидланганидек, 2015 йил давомида Хоразм вилоят адлия бошқармаси ва унинг тизимидаги давлат нотариал идоралари ва ФҲДЁ органлари томонидан белгиланган режа асосида муайян ишлар амалга оширилди.

Хусусан, маҳаллий давлат ҳокимияти органларининг норматив хусусиятга эга бўлган 93 та қарор лойиҳалари ҳуқуқий экспертизадан ўтказилиб, уларнинг 91 тасига расмий розилик берилган.

Адлия бошқармаси томонидан тадбиркорликни қўллаб-қувватлаш, шартномавий-ҳуқуқий интизомни мустаҳкамлаш ҳамда инсон ҳуқуқларини ҳимоя қилишни таъминлаш борасида ўтказилган 135 та режа-тадбирлар давомида 13 мингдан ортиқ қонунбузилиш ҳолатлари аниқланган.

Қонунбузилиш ҳолатларини бартараф этиш мақсадида 651 та тақдимнома ва 703 та огоҳнома киритилиб, 422 нафар шахс интизомий жавобгарликка тортилган, шундан 11 нафари эгаллаб турган лавозимидан озод этилган, ҳокимликларнинг 49 та, назорат қилувчи органларнинг 24 та, жами 73 та қарорлари бекор қилинган.

Тадбиркорлар, хорижий инвестициялар ва хорижий инвестициялар иштирокидаги корхоналар ҳамда фуқаролар манфаатини кўзлаб, уларнинг бузилган ҳуқуқ ва қонуний манфаатларини тиклаш, моддий ва маънавий зарарларни ундириш тўғрисида судларга киритилган 1 млрд. 129 млн. сўмликдан ортиқ 520 та даъво аризалардан 432 таси бўйича 854 млн. 517 минг 600 сўм миқдоридаги маблағлар ўз эгаларига қайтарилган ва 17 та даъво аризалар судгача ҳал этилганлиги сабабли рад қилинганлиги қайд қилинди.

Шунингдек, 2015 йил давомида Жисмоний ва юридик шахсларнинг 510 та мурожаатлари кўриб чиқилиб, 150 таси қаноатлантирилган. Шунингдек, “Ишонч телефон”ларига қилинган 19 та мурожаатларнинг 9 таси қаноатлантирилганлиги қайд этилиб бу борадаги ишларни жонлантириш бўйича алоҳида чора-тадбир белгилаб олинган.

Йиғилишда муҳокама этилган барча масалалар юзасидан Ҳайъатнинг тегишли қарори қабул қилинди.