Янгиликлар
ЭЛЕКТРОН ҲИМОЯ ТИЗИМИ
Хоразм вилоят адлия бошқармасида ҳудуддаги назорат қилувчи органлар вакиллари ҳамда тадбиркорлик субъектлари жалб қилинган ҳолда “Текширишларни рўйхатга олиш китобининг электрон шакли”ни амалиётга кенг жорий этиш масаласига бағишланган кўргазмали семинар ўтказилди. 
Тадбирни вилоят адлия бошқармаси бошлиғининг биринчи ўринбосари У.Абдуллаев очиб бериб, республикамизда қулай ишбилармонлик муҳитини шакллантириш, кичик бизнес ва хусусий тадбиркорликни ривожлантириш йўлидаги ортиқча бюрократик тўсиқ ва ғовларни бартараф этиш борасида амалга оширилаётган ишларга қарамасдан назорат қилувчи органлар томонидан тадбиркорлик субъектлари фаолиятига ноқонуний аралашув ҳолатлари хали-ҳанузгача кузатилаётганлиги, мана шундай ҳолатларнинг олдини олиш ҳамда тадбиркорлик субъектлари учун янада қулайлик яратиш мақсадида Адлия вазирлиги ҳамда бошқа мутасадди ташкилотлар билан ҳамкорликда текширишларни рўйхатга олиш китобининг онлайн электрон тизими яратилиб, унинг электрон шакли жорий этилганлигини таъкидлаб ўтди.
Эндиликда эса текшириш ўтказилаётган хўжалик юритувчи субъектларда техник имконият мавжуд бўлганда мажбурий тартибда текширишларни рўйхатга олиш китобининг электрон шакли текшириш ўтказаётган мансабдор шахслар томонидан тўлдирилиши шарт. Бундай ҳолатда китобнинг қоғоз шаклини тўлдириш талаб этилмайди.
Шунингдек, семинар давомида бошқарманинг Тадбиркорлар ҳуқуқларини ҳимоя қилиш бўлими ходимлари томонидан назорат қилувчи органлар вакиллари ҳамда тадбиркорлик субъектларига Текширишларни рўйхатга олиш китобининг электрон шаклини тўлдириш тартиби видео-слайдлар орқали намойиш этилиб, 
уларга батафсил тушунтиришлар берилди ва мазкур китобнинг электрон шаклини тўлдиришда назорат қилувчи органлар вакилларининг масъулиятини ошириш борасида тегишли чора-тадбирлар белгилаб олинди.
Семинар-тақдимот якунида иштирокчилар ўзларини қизиқтирган масалалари юзасидан ўз фикр ва мулоҳазаларини билдирдилар.
Бундай тадбирлар келгусида назорат қилувчи органларнинг бу соҳадаги фаолиятларида қонунбузилиш ҳолатларига йўл қўйилишини олдини олишга ҳамда тадбиркорлар ҳуқуқларини янада ишончли ҳимоя қилинишни таъминлашга хизмат қилиши қайд этилди.