Республикамиз мустақилликка эришгач, иқтисодий ислоҳотларни амалга оширишнинг дастлабки босқичида тадбиркорликни ривожлантириш, ушбу соҳа вакилларига ҳар томонлама кўмаклашишга алоҳида эътибор қаратилди.

Мухтарам Президентимизнинг 2015 йил 15 майдаги “Хусусий мулк, кичик бизнес ва хусусий тадбиркорликни ишончли ҳимоя қилишни таъминлаш, уларни жадал ривожлантириш йўлидаги тўсиқларни бартараф этиш чора-тадбирлари тўғрисида”ги ПФ-4725-сон Фармони ҳамда 2015 йил 28 сентябрдаги “Тадбиркорлик субъектларига “Ягона дарча” тамойили бўйича давлат хизматлари кўрсатиш тартибини янада такомиллаштириш чора-тадбирлари тўғрисида”гиПҚ-2412-сон Қарори ижросини таъминлаш юзасидан вилоятнинг барча туман (шаҳар) ҳокимликлари ҳузуридаги тадбиркорлик субъектларини рўйхатдан ўтказиш инспекциялари негизида тадбиркорлик субъектларига “ягона дарча” тамойили бўйича 16 турдаги давлат хизматлари кўрсатиш “Ягона дарча” марказлари ташкил этилди.

Хозирда марказлар малакали мутахассислар билан тўлдирилиб, марказга мутахассисларни ишга қабул қилиш ва лавозимидан озод этиш адлия органлари билан келишилган ҳолда амалга оширилишининг ҳуқуқий асослари яратилди.

“Ягона дарча” марказлари томонидан жорий йилнинг ўтган давридажами 12 042 та тадбиркорлик субъектлари давлат рўйхатидан ва қайта рўйхатдан ўтказилган бўлса, шу даврда тадбиркорлик субъектларига 3 698 та давлат хизматлари кўрсатилган. Тадбиркорлик субъектларидан “Ягона дарча” марказларининг ҳисоб рақамларига рўйхатдан ўтказиш ва қайта рўйхатдан ўтказиш ҳамда бошқа тўловлар бўйича жами: 1,1 миллиард сўмдан ортиқ пул маблағлари келиб тушган.

Бугунги кунда вилоятдаги “Ягона дарча” марказларининг кадрлар салоҳиятини доимий равишда ошириб бориш, давлат органлари билан ўзаро ҳамкорлик механизмларини такомиллаштириш, уларга амалий ва услубий кўмак кўрсатиш билан бир қаторда, мутахассислар томонидан ижро интизоми, идоралараро электрон ҳамкорлик тизимидан фойдаланиш бўйича индивидуалўқув машғулотлар ўтказилиши ҳам йўлга қўйилган.

Хусусан, “Ягона дарча” марказлари ҳамда хизмат кўрсатувчи ҳамкор ташкилотлар раҳбарлари ва масъул ходимлари иштирокида идоралараро электрон ҳамкорлик тизимида ишлаш ҳамда тадбиркорларга хизмат кўрсатиш тартиблари бўйича, Ўзбекистон Республикаси Ахборот технологиялари ва коммуникацияларини ривожлантириш вазирлиги Хоразм вилоят ҳудудий бошқармасида “Ягона дарча” марказларининг АКТ бўйича масъул ходимлари билан “АКТни жорий этиш ҳамда ахборот хавфсизлигини таъминлаш” йўналишларида семинар-машғулотлар ўтказилди. Шунингдек, “UNICON.UZ” давлат унитар корхонаси мутахассислари вилоят ИИБ Ёнғин хавфсизлиги бошқармасида “Ягона дарча” марказлари, шунингдек хизмат кўрсатувчи ҳамкор ташкилотлар ўртасида тадбиркорлик субъектларига давлат хизматлари кўрсатишда электрон ҳужжат алмашинуви бўйича ўқув семинар машғулотлари ўтказилиб,унда “E-ijro” тизимида ишлаш, ҳужжатни киритиш, ташкилотларга юбориш, ташкилотлардан келган хатларни қабул қилиш жараёнлари тўғрисида батафсил маълумотлар берилди.

Тасдиқланган режа-жадвалига асосан “Ягона дарча” марказлари ходимлари, рўйхатга олиш инспекторлари ва хизмат кўрсатувчи туман (шаҳар) ташкилотларнинг масъул ходимлари “Электрон ҳукумат” бўйича 20 соатлик махсус ўқув курсларида иштирок этиб, уларга мазкур ўқув курсларини муваффақиятли тамомлагани учун “Электрон ҳукумат” ўқув марказининг сертификатлари топширилган.

Бугун мамлакатимизда кичик бизнес ва хусусий тадбиркорликка кенг йўл очилаётгани, ишлаб чиқариш соҳалари эркинлаштирилаётгани, давлатнинг назоратчилик ва бошқарувчилик вазифаси қисқартирилаётгани, тадбиркорлик субъектларининг молия-хўжалик фаолиятига аралашувнинг чекланаётгани ҳамда уларга давлат рўйхатидан ўтказишда қатор қуллайлик ва имтиёзлар берилаётгани, аввало, давлатимиз тараққиётига хизмат қилмоқда.

Р.Матрасулов, Хоразм вилоят адлия бошқармаси 

Юридик шахсларни давлат рўйхатидан ўтказиш бўлими бошлиғи