Ижара шартномаларини тасдиқлаш нотариал идоралар томонидан амалга оширилаётган ҳуқуқий ҳаракатларнинг аксарият қисмини ташкил этади. Нотариал тартибда тасдиқланаётган ижара шартномалари сони биргина Ҳазорасп тумани бўйича ҳар йили ўртача 8-10 фоизга ортаётганида бу борадаги ишлар кўлами нечоғлик эканлигини далиллайди.

Фуқаролик кодексининг 34-боби, 535-616-моддалари мулк ижарасига оид шартномалар билан боғлиқ бўлган қоидаларни тартибга солади. Шунингдек, ижара шартномаларини тузиш тартиби, ижара объект­лари, ижара шартномаларини тузишда қатнашадиган субъектлар, яъни юридик ва жисмоний шахсларнинг ҳуқуқ ва мажбуриятлари ҳамда мулк ижараси билан боғлиқ бошқа қоидаларни ҳам ўз ичига олади.

Мулк ижара шартномасини тасдиқлашда ижарага олинаётган мулк­ка нисбатан ҳуқуқни тасдиқловчи ҳужжат, башарти, ушбу мулк давлат рўйхатидан ўтказиладиган бўлса, уни бошқа шахсга ўтказиш тақиқланмаганлиги ва хатланмаганлиги ҳақида маълумот, ижара предмети эр-хотиннинг умумий мулки мақомига эга бўлган тақдирда, уларнинг розилиги, ижарага берувчи ва ижарага олувчи ўртасида мол-мулкни топшириш ва қабул қилиш бўйича тузилган далолатнома, васийликдаги шахсга қарашли бўлган мол-мулк бир йилдан ортиқ муддатга ижарага берилганида эса васийлик ва ҳомийлик органларининг розилиги талаб этилади.

Мулк ҳуқуқи асосида фуқароларга тегишли бўлган кўчмас мулкни (уй, квартира, уй ёки квартиранинг бир қисми ва бошқалар) ижарага бериш учун эса нотариал идорага мазкур мулкка бўлган ҳуқуқни тасдиқловчи ҳужжат, “Ергеодезкадастр” давлат қўмитаси ҳудудий бўлинмасининг маълумотномаси, шунингдек, бинолар ва иншоотларга бўлган ҳуқуқнинг давлат рўйхатидан ўтказилганлиги тўғрисидаги гувоҳнома ҳамда доимий рўйхатга олинган шахсларнинг розилиги ҳақидаги ҳужжатларни тақдим этиш зарур.

Юридик шахсларга тегишли бўлган кўчмас мулкни (уй, квартира, уйнинг ёки квартиранинг бир қисми ва бошқаларни) ижарага бериш шарт­номаларини нотариал тасдиқлаш учун қўшимча равишда розилик берувчи юридик шахснинг таъсис ҳужжатлари, мазкур юридик шахс давлат рўйхатидан ўтказилганлиги ҳақидаги гувоҳнома, у томонидан нотариусга ижара шартномасини тасдиқлаш юзасидан вакил қилиб юборилган шахс номига берилган ишонч­нома, юридик шахс ваколатли органларининг кўчмас мулкни ижарага бериш (олиш) ҳақидаги ҳужжати ва ҳоказо ҳужжатлар давлат нотариал идорасига топширилиши шарт.

С.Саидаматов, Ҳазорасп туман 2-сон давлат нотариал идораси нотариуси