— Қизимнинг исми Машрабхон. Ёши ўн иккида. Исмини Мадинахонга ўзгартирмоқчимиз. Бунинг учун қандай ҳужжатлар талаб қилинади?
Замирахон ЗИЁДОВА, Бешариқ тумани
— Исмни ўзгартириш учун яшаш жойингиздаги ФҲДЁ бўлимига қуйидаги ҳужжатларни тақдим этишингиз керак:
— ота-она паспортидан нусха;
— қизингизнинг туғилганлик ҳақидаги гувоҳномаси;
— туғилганлик ҳақидаги далолатнома ёзуви нусхаси.
Сўнгра тегишли тартибда ФҲДЁ бўлимида ота-она номидан ариза ёзилиб, ушбу аризада қизингизнинг розилиги ҳам кўрсатилади.
— Мен никоҳга киришда турмуш ўртоғимнинг фамилиясини танлаган эдим, аммо энди ўз фамилиямга ўтмоқчиман. Буни қандай амалга ошириш мумкин?
Нилуфар САИДБОБОЕВА, Бешариқ тумани
— Агар сиз никоҳга киришда турмуш ўртоғингизнинг фамилиясига ўтишни танлаб, ҳали паспортингизни алмаштирмаган бўлсангиз, у ҳолда, никоҳгача бўлган фамилиянгизга қайтиш учун яшаш жойингиздаги ФҲДЁ бўлимига ариза беришингиз мумкин. Никоҳ далолатнома ёзувига ўзгартиш киритилади. Бунда сиз ФҲДЁ бўлимига қуйидаги ҳужжатларни тақдим этасиз:
— Паспорт нусхаси;
— Никоҳ гувоҳномаси ва никоҳ далолатнома ёзуви нусхаси.
— Ота-онамнинг фамилияси Заидов, аммо, менинг туғилганлик гувоҳномамда улар Зоидов кўрсатилганлиги сабабли мен отамнинг номидаги уйга прописка қилдира олмаяпман. Буни қандай тўғрилаш мумкин?
Одилбек ЗОИДОВ, Бешариқ тумани
— Агар сиз вояга етган бўлсангиз, туғилганлик ҳақидаги далолатнома ёзувидаги ота-онангиз фамилиясини тузатиш учун ота-онангизнинг никоҳ гувоҳномаси, паспорт нусхалари, отангизнинг туғилганлик ҳақидаги далолатнома ёзуви нусхаси, паспортингиз нусхаси ва туғилганлик ҳақидаги гувоҳномангиз билан ФҲДЁ бўлимига мурожаат этасиз. Агар отангизнинг барча ҳужжатларида Заидов кўрсатилган бўлса, у ҳолда ота-онанинг фамилияси тузатиш киритиш йўли билан тўғриланади. Вояга етмаганларнинг далолатномаларига тузатиш киритиш уларнинг ота-оналари аризаси билан амалга оширилади.
Саволларга Бешариқ тумани ФҲДЁ бўлими
мудири Хосиятхон МАМАЖОНОВА жавоб берди.